కాకతీయ రాతికోట వద్ద మద్యం సీసాలు కలకలం

• చారిత్రక కట్టడం పరిసరాల్లో పరిశుభ్రత, భద్రతపై ప్రశ్నలు

వరంగల్, ప్రజానేస్తం జ్వాల ప్రతినిధి:ఓరుగల్లు చారిత్రక వైభవానికి ప్రతీకగా నిలిచిన కాకతీయ రాతికోట ప్రవేశ ద్వారం సమీపంలో మద్యం సీసాలు కనిపించడం చర్చనీయాంశంగా మారింది. చారిత్రక కట్టడాన్ని సందర్శించే పర్యాటకులు, స్థానికంగా నడకకు వచ్చే ప్రజలకు ఇబ్బందులు కలగకుండా పరిసరాలను పరిశుభ్రంగా ఉంచాల్సిన అవసరం ఉందనే అభిప్రాయాలు వ్యక్తమవుతున్నాయి.
రాతికోట ప్రవేశ ద్వారం కుడివైపు మద్యం సీసాలు ఉన్నట్లు వీడియోలో కనిపిస్తున్న దృశ్యాలు అక్కడి నిర్వహణ, పర్యవేక్షణపై ప్రశ్నలు లేవనెత్తుతున్నాయి. అయితే, ఆ సీసాలను ఎవరు అక్కడ ఉంచారు, అక్కడ మద్యం సేవించారా అనే విషయాలు ఇంకా నిర్ధారణ కావాల్సి ఉంది.
చారిత్రక ప్రదేశాల పరిరక్షణకు సంబంధిత అధికారులు ఎలాంటి చర్యలు తీసుకుంటున్నారు? అక్కడ సీసీ కెమెరాలు ఉన్నాయా? ఉంటే అవి సక్రమంగా పనిచేస్తున్నాయా? రాతికోట పరిసరాల్లో పరిశుభ్రత, భద్రతను పర్యవేక్షించేందుకు ఎలాంటి ఏర్పాట్లు ఉన్నాయి? అనే ప్రశ్నలు ప్రజల్లో ఉత్పన్నమవుతున్నాయి.
కాకతీయుల చారిత్రక వారసత్వాన్ని కాపాడటంతో పాటు పర్యాటకులకు ఆహ్లాదకరమైన వాతావరణం కల్పించేందుకు అధికారులు స్పందించాలని స్థానికులు కోరుతున్నారు. రాతికోట పరిసరాలను పరిశీలించి, మద్యం సీసాలను తొలగించి, ఇలాంటి ఘటనలు పునరావృతం కాకుండా తగిన చర్యలు తీసుకోవాలని విజ్ఞప్తి చేస్తున్నారు.చారిత్రక సంపదను కాపాడటం అందరి బాధ్యత. ఈ అంశంపై సంబంధిత అధికారులు స్పందించి తీసుకునే చర్యలపై స్పష్టత ఇవ్వాల్సిన అవసరం ఉంది